添馬男
八十年代畢業於港大，八九年六四時身陷北京前門人潮，從此對政治興趣不能自拔，在傳媒及政圈浮沉多年。獲損友邀請在蘋果撰寫專欄《中門大開》，決心闖入總部，用一本iPad，一枝筆及一張摺凳，揭露政治圈內「膠人膠事」，寸嘴得嚟又有根有據，開本地政治評論新風格。
2013-11-11 6:00:06
左報打手痛斥泛民賤骨頭，聲稱要由中聯辦強硬對付，行文極似文革時打倒反革命分子宣傳文宣，但如此高調突出西環治港角色，未必符合西環利益。講起賤骨頭，又點小得嗰班甘心俾中聯辦操控嘅建制派議員，尤以西環契仔契女、葉劉新民黨、經民聯為代表，民建聯算做好少少。
政府中人對某些建制派議員痛恨程度，遠超於反對派泛民，好多人唔明，認為港英餘孽與泛民眉來眼去，暗通曲款，並以此向中央打小報告。其實一字咁淺，政務官冇乜政治傾向、個人感情，最緊要係get the job done，做好件事，好好醜醜，唔好搞到一褲都係，臭氣逼人。對家泛民明刀明槍，乜嘢路數大家都估到，而且好少出陰濕招，更重要反對派冇乜攞政府着數，即係嗰啲乜基金、物基金撥款，近幾年政府基金大部份撥比建制派、樁腳團體及外圍組織。但呢棚所謂建制派利益攞盡，要做事就借頭借路閃開，成為肥龍口中之「福臨門黨」。
據官場中人表示，個別議員寸到連局長電話都唔多理會，莫講話副局政助，至少由奶媽林鄭打來先至會聽聽。但凡要撐政府不受歡迎決定，當然要付出代價，包括俾傳媒抽插、俾網民惡搞圍攻，受人二分四，當然要去頂。但呢棚蠱惑建制派就食到盡，又想攞民望，又想搵着數，於是便反過來企喺對家一邊，反插政府官員、特首。
大佬照住 建制派食到盡
特區政府冇法在議會內形成穩固政治聯盟，散修修，原因在於蠱惑賤骨頭太多，政府不斷提供政治酬庸，佢地就奉旨食飽含住牙籤走人。而建制派議員公開批評政府，其輿論效果往往高泛民幾倍，因為傳媒會認為連政府自己友也反對，可想而知政府決策草率及大有問題。個別建制派議員可以咁寸，因為背後另有大佬照住，呢位大佬就在西環。
有陰謀論者認為由始至終係一場戲，如果西環識做，應該就閂埋門訓示自己契仔契女要聽特首話，但實情係特首冇法攞到自己友票，就終要求助於西環，又或者契仔契女先搗亂，在西環介入下才歸隊，可能根本是劇本一部份，因為咁先至可以凸顯出西環「支持及協助維持行政主導體制」，有着不可替代的地位！聽落又好似有道理。
彭定康在最後一份施政報告中，說：“My anxiety is this: not that this community's autonomy would be usurped by Peking, but that it could be given away bit by bit by some people in Hong Kong.”肥彭早在十幾年前已睇通今日個局！
沒有留言:
發佈留言