添馬男
八十年代畢業於港大，八九年六四時身陷北京前門人潮，從此對政治興趣不能自拔，在傳媒及政圈浮沉多年。獲損友邀請在蘋果撰寫專欄《中門大開》，決心闖入總部，用一本iPad，一枝筆及一張摺凳，揭露政治圈內「膠人膠事」，寸嘴得嚟又有根有據，開本地政治評論新風格。
2012-9-6 7:04:31
殖民地年代初中中史只教到晩清，近現代欠奉，何解，現代史有太多水份、有害毒物滲雑其中，會令人不知不覺間受蒙蔽。學生不察，變了盲毛老左，港人父母最怕。我細個時鄰居係左派家庭，為了與殖民地政府鬥爭，唔裝水錶，仔女讀勞校，白恤衫，藍扯褲，孭綠色帆布袋做書包，最後冇參加會考，中學畢業後去國貨公司做售貨員。我讀教會學校，打領呔，灰絨短褲，長襪黑鞋。十歲左右已明白大家分別，成條冷巷細路都視這家人為怪人。舊區在七十年代掛青天白日旗慶祝雙十國慶，只有他一家人掛五星旗慶祝十一。
香港人慣用「愛國」、「親中」去稱呼呢班人，其實應稱為親共才正確。因為愛國親中，不等如親共，反共亦非不愛國。為何七十年代親共被人視為盲毛，大家唔好忘記香港人口構成之中，有不少家庭乃受共黨迫害，又或者在大飢荒時拼命求存偷渡來港。當大家發現身邊竟然有人真心相信文革謊言，心裡自然會好奇怪。
電影「老港正傳」，講出了左派家庭的痛苦，做唔到警察，冇會考自然難搵工，在左派系統中工作，慢慢比時代淘汰。香港人早就睇穿盲目親共的後果，因為愚昧影響了你人生重要抉擇，左派在國貨公司當售貨員，人數不小，但只有一個陳婉嫻能出頭，眼見昔日鄰居參加會考，升預科，再入港大，乘住八十年代香港高速發展，出來工作不到十年已晉身中產，你話左派家庭出身做國貨公司那位青年人個心有幾難受。
親共愛黨之路難行，並非因為殖民地排斥，而是難融入主流社會，六七十年代左派自成系統，有自己學校、報紙、電影、戲院、足球隊、工作單位，自給自足，但八十年代左派系統被中產主流淘汰，香港人形成本土身份認同，點會仲去珠江戲院睇戲，行日資八百伴至係潮，點會仲行國貨公司，足球隊梗係捧有荷蘭外援精工，點會捧左派球會愉園。
香港人早就領教過盲目親共愛黨對個人發展所造成嘅後果，你話而家學校只係教國旗，學唱國歌，但一講五星國旗，點會唔教中國共產黨核心思想，如工農小資及民族資產等階級分析，再扯落去就係建國後不斷階級鬥爭，你話點教？一講國歌，就必然講抗日，再扯落去就係共產黨抗日有何貢獻，如何評價國民黨抗日貢獻，及國民黨抗日毛澤東則全力「擴紅」抽後腳行為。現代黨史謊話連篇，反右為何至今未全部平反？大躍進死幾多人？文革死幾多人？不如由愛黨親共的林鄭作答。
刊於蘋果日報，金融中心版：http://hk.apple.nextmedia.com/apple/index/15523461
沒有留言:
發佈留言