筍工反智論 添馬男 主場新聞

2014年2月7日

中門大開：筍工反智論

最近《明報》副刊專欄作者屈穎妍諷刺林慧思請假筍工論，同《金雞SSS》揶揄長毛掟完嘢唔使做「筍工」論、示威收錢筍工論，全部都係一條line to take（LTT）。建制派、挺梁及反泛民陣營，由於欠缺政治論述水平，冇辦法從理念、策略層面win an argument，只有採用最粗糙、反智嘅動機論，用「攞着數」作攻擊，訴諸低B群眾。

fb興起　愚弄群眾有難度

香港表面係中產社會，自吹自擂國際都會，但總有一大棚欠缺政治信念，以「無敵爛gag王」、「無知女人仔」為榮嘅群眾。一群人酒吧吹水，必有一條smart ass西裝友用爛gag方式作政治表態，「掟完嘢收工𢭃八萬跟手落老蘭攬女」、「講句粗口就放大假」，就係呢類人最buy。

第二種就係OL、小白領、女人仔，開場白定必是：「我一個女人仔就唔識乜嘢政治」，然後第二句：「但講句粗口就放大假，好筍啫！」呢種先自貶唔識政治，其實係一種以退為進策略，如果你認真反駁佢，當勢色唔對，就立即變回無知女人仔，「我唔識咁多，費事同你拗」。

以往呢條LTT好work，因為冇fb，掌握大眾媒介，如電影、電台節目、報紙副刊地盤之人，收到order後，就可用反智觀點愚弄群眾，即使唔認同嘅人，亦好少為此等反智論作認真反擊，即使有此念頭，亦冇媒介陣地反駁。

好彩𠵱家人人手上有陣地，一出街就立即俾人砌，跟手大眾傳媒跟進，結果功效大減。但大家唔好以為呢種反智論冇市場，只要一日有無綫「最緊要一家人齊齊整整」為主旋律嘅電視劇、商台鬧劇式節目，以搞gag方式討論時事，就一定有愚民。

至於精英、知識分子，靠佢哋去反駁？唔好講笑，呢棚以《明報》為代表嘅所謂知識分子，講大道理就天下無敵，根本對社會欠認識，呢種「維基知識分子」，上維基抄資料，文章旁徵博引，用2,000字論證阿媽係女人，苦心經營自己個人形象，有姿態，冇立場，又係嘥氣。至於廣大專業人士，書都唔讀多本，冇諗法，眼中只有消費。

幸好，香港新一代，正努力擺脫反智社會，「筍工論」不過是迴光返照！