馬虎 添馬男 主場新聞

2014年01月30日

http://hk.apple.nextmedia.com/financeestate/art/20140130/18610172

馬年祝福好多時都會食字，如「馬」到功成、龍「馬」精神、但馬字一樣有唔吉利用語，如馬馬虎虎、六七十年代經常笑人小心「馬上風」。馬年運勢唔使掉轉羅庚都識得睇，幾壇大嘢殺緊埋身，經濟方面退市在即，股市借勢向下，樓市持續陰乾。香港經濟動力靠晒內地，全個政府除咗搶地起樓，似乎冇乜計劃。搞個科技局，盛傳由羅范走馬上任，睇怕又係老董式大白象搞硬件項目。

傳媒成戰場　逼歸邊就範

至於政治，唔使多講，香港人唔多信習近平中國夢，內地亦越來越公開唔妥香港，呢個矛盾，只有越來越大。

香港要向國際接軌，大談核心價值，內地視之為毒草，代表西方軟實力和平演變中國。內地維穩之手伸入香港，毫不避忌，只會令香港人厭共情緒更大，變成否定內地一切。呢個趨勢，自1978年起未曾試過。

內地與香港矛盾擴大下，搞普選政改，唔彎就有鬼，原地踏步對梁振英最有利，當維持小圈子1,200人，邊條友仲敢參選。大家睇睇杯葛自由黨、渣打馬拉松，已經知道梁處事冇底線，有仇必報，話之你資深黨員、港澳辦契仔，一律照打，未入閘已遍體鱗傷。政改拉倒唔算絕望，梁做多一屆先至絕望。馬年政局如此，想唔癲都幾難。

傳媒會繼續成為主戰場，收起陳淨心、愛字頭，改用周融、施永青，尤其後者，效果好好多，《明報》真係要跟施老闆學嘢！

傳媒互片鬼打鬼會是馬年新猷，繼TVB封殺壹傳媒（282）後，施永青赤膊上陣片肥佬黎，真係笑死人。總之唔歸邊反佔中，就由其他傳媒收拾佢，睇怕下一round就輪到網媒，「主場新聞」要整多幾套server，風暴來臨時唔係咁易頂。

香港淪落乃大勢所趨，弔詭之處係梁越亂搞，地位就越穩固，中央為政改，又伸手來搞，人人插隻手，香港猶如被「五馬分屍」。馬年想馬馬虎虎碌過去？好難！當政局講求歸邊，講敵我、黨同伐異，政治手段污糟，香港要返回昔日一團矛盾，即係處理政治任務，得過且過，應付中央，馬虎了事，相信已冇機會了。

香港本非極端政治溫床，一切以常識、文明方法解決，但今日已出現質變，政府處事毫無底線可言，眾多政治、傳媒中人，馬年真係要睇路！