梁粉鬧劇得人驚 _ 添馬男 _ 主場新聞

添馬男

八十年代畢業於港大，八九年六四時身陷北京前門人潮，從此對政治興趣不能自拔，在傳媒及政圈浮沉多年。獲損友邀請在蘋果撰寫專欄《中門大開》，決心闖入總部，用一本iPad，一枝筆及一張摺凳，揭露政治圈內「膠人膠事」，寸嘴得嚟又有根有據，開本地政治評論新風格。

2012-10-25 6:33:43

啟德「打造」為將軍澳鬧劇，梁粉蔡涯棉認錯，一人獨力攬上身，表示政府官員從未與他接觸，亦在長遠房屋督導委員會中冇討論過。體育界火紅火綠之際，蔡涯棉自然要為此降溫。但究竟擱置體育城之妙計，是否只係蔡兄一人亂嗡，我睇未必，當中內幕仲未揭開。

如果只係一條蛋散亂咁嗡，你估許晉奎、彭沖班友儍咩，體育界一路跟政府搵食，乃建制派之中的建制派，一摸底就知擱置計劃是真還是假，佢地咁大膽站出來對著幹，當然知道事態不簡單，不是一條蛋散亂嗡。今次係梁營同曾德成、林鄭等前朝官員角力，體育界如果冇人tip off，邊敢企到咁前。

梁振英口口聲聲話要行之正道，從今次事件可見，梁營中人行事手法，絕非正道之人。啟德發展區規劃，乃經長時間藴醸，體育城計劃亦非一朝一夕。要推倒重來，也要有合適程序，即使占用休憩用地起樓，提高地積比率，亦必須重新諮詢。此事之不尋常係蔡涯棉出來發表偉論後，竟然冇一個現任司局長敢企出來表明絶無此事，林鄭唔出聲、曾德成唔出聲、張炳良不置可否、陳茂波支支咗咗，講咗等如冇講。假如蔡涯棉只係一人忽發奇想，政府官員未有討論擱置建議，何解司局長反應咁奇特，人人迴避，拒絕向公眾及體育界澄清。

政府施政，絕對不能走精面，一計不成，又生一計，毫無章法可言。七月一日至今不到四個月，施政美其名成熟一項推出一項，實則係胡亂突發，東搞一搞，西搞一搞，邊度可以鑽空子，攝到位，就搞邊瓣。咁樣做管理，尤如士多老闆，見夥計得閒，就去執執貨，或用雞毛掃抹抹塵，或出街貼街招。

十年之後，董朝亂象又再現，不過大家咪以為只有房屋土地一項亂籠，官場中人估計下一個大亂的政策，將會係不食人間煙火之環保局長星爺。

七月至今，香港人感覺上已過咗兩三年，但數一數只有三個幾月，官場中人話而家返工渡日如年，香港人何嚐不是！

刊於蘋果日報，金融中心版