真正香港速度 _ HouseViews _ 主場新聞

HouseViews

由主場新聞創辦人劉細良撰寫的主場觀點

2012-10-8 17:35:56

十一海難政府委任獨立調查，不知何時才有報告，相信至少半年。而改善香港水上交通安全，卻刻不容緩。只見記者報道，一些渡輪未有救生衣、有些則不方便乘客取用，而標示存放兒童救生衣的地方，打開門全是雜物。

梁振英口口聲聲話民生無小事，要急市民所急，為何關乎社會大眾安全、竟然可以歎慢板呢？他高舉香港速度旗幟，去咗邊度？

梁粉人士或會辯稱獨立調查用半年並不為過，表面言之成理。但早在1993年元旦倒數蘭桂芳人踩人慘劇中，肥彭已做了一次示範，點㨾先至係急市民所急，而非空口講白話。當時彭定康委任包致金大法官做獨立調查，但中期報告要在兩星期內完成，包致金就在一月十三日發表中期報告。

原因係新曆年後一個月唔到就係農曆年，期間一樣會有大量人群眾集的活動，所以警方要立即檢討人群控制政策及措施，不能等包致金半年後先至提交報告。其實，如果調查期內再有意外，肥彭自己都好麻煩。

包致金中期報告內的建議，警方立即採用。而目前在人群控制方面，香港是做得十分成功。嗱，大家睇清楚！呢款先至係急市民所急。而家日日坐渡輪上班落班市民，都咪話唔擔心！
正如范太金句：「自己唔掂就唔好怪人」。災難無人想見，但預防就要做到足，如果半年內因政府冇從速檢討改善水上交通安全，一旦再有意外，特首責無旁貸。

所以話唔好怪香港有人會懷念港英時代。1992年大除夕，肥彭抵港履新還不到半年，有冇怨上手衛奕信留低爛攤子、有冇左推右搪？巡視嘉利大火現場，有冇掛住去搶出鏡、埋咪講野？又有冇為現場消防兄弟打氣？

香港人，其實好公道。