添馬男
八十年代畢業於港大，八九年六四時身陷北京前門人潮，從此對政治興趣不能自拔，在傳媒及政圈浮沉多年。獲損友邀請在蘋果撰寫專欄《中門大開》，決心闖入總部，用一本iPad，一枝筆及一張摺凳，揭露政治圈內「膠人膠事」，寸嘴得嚟又有根有據，開本地政治評論新風格。
2012-12-24 6:38:20
李剛及彭清華係雞咁腳走，連同香港各界友好話別亦冇機會，李剛調去澳門做副主任，也十分之冇面，有摵柴之含義。明顯中聯辦今次係孭鑊，但至於為乜事搞到咁大鑊，當然同佢哋力挺梁振英做特首有關。
回歸以來揀特首，本地土共同中央都暗戰頻頻。老江魯平撐老董，中聯辦就撐李福善、楊鐵樑，老董落台，中聯辦已推梁振英，但北京卻起用曾蔭權，到今屆本來中央支持唐英年，但他中伏，俾梁營暗算，在林鄭配合下玩死咗唐英年，梁振英上台，以本地商界務實作風，應該歸隊，支持建制。但因今次工商界自覺俾西環出賣，啖氣下唔到，至今冇一個挺唐大商家肯公開表態支持梁振英。建制分裂，社運抬頭，香港已步入不可管治危機。
十八大重新佈局，香港需要穩住形勢，梁振英已無政治能量駕馭政黨、政務官及工商建制，佢本人作風也大有問題，從政30年竟孤獨到冇朋友，得幾條蛋散梁粉在搖旗吶喊，蔡涯棉當自己係政府發言人，大家就知出事。當TVB日日由古明華出嚟講電視發牌，做TVB發言人，你話幾大鑊。
政治問題 張曉明揸旗
要平息被出賣的本地工商大孖沙，自然要向挺梁大將問責，中央出手做嘢，本地大孖沙就要畀面，唔可以再搞分裂。但要大孖沙團結在梁特首周圍係冇可能，佢哋要畀面只會畀阿爺。所以空降張曉明，就係由佢出手團結番散收收的建制力量，也只有佢先做到，你叫原本有份參與唐梁廝殺的李剛、彭清華做？冇可能做到。如此一來，特區市委書記與市長制度成形，張搞政治工作，梁處理民生事務，溫總提出六大民生施政工作，就由市長梁振英處理，其他政治問題，唔使佢做，交巿委書記負責，由張曉明吹雞。
如此人事變動，是為咗令撕裂之建制力量重新團結在張曉明之下，「協助」振英更好地管治香港，張一上場，黃楚標立即科水購回DBC大班股份，平息風波，可見他殊不簡單。
刊於蘋果日報，金融中心版
沒有留言:
發佈留言