陳克勤埋錯站等錯車 _ 主場新聞 House News

黃俊邦

中大政治行政學系畢業後開始搞事，範疇廣泛，乜都係政治，連巴士迷及球迷兩個身份都被邊緣化及政治化。現為香港獨立媒體網編輯。

2012-9-10 17:36:08

早一輪民建聯既陳克勤出左份單張，係咁俾人笑。單張見到佢係金鐘政府總部外等 373A，點解揀果度？斷估應該係貪果度人少少易影相同埋 373A 都算係其中一條服務新界東既路線掛。之不過係呢個站等 373A 係曬氣，因為 373A 係由粉嶺開往灣仔，係呢度只會等到往灣仔既 373A，基本無人會咁搭車。佢仲只係一條晨早開幾班既線，難怪網友笑呀陳生埋錯站等錯車。

事件迅即擴大，上載相片的民主黨李健文與有份等車民建聯劉國勳在 facebook 大戰。（https://www.facebook.com/photo.php?fbid=486944334649118&set=p.486944334649118）劉國勳當然是大談民建聯有幾努力，去為北區居民爭取更多交通服務同埋巴士路線。Direct quote 劉國勳段面書留言係咁：「我做交通運輸委員會主席前果八年，是由民主黨黃成智與潘忠賢做交通及運輸委員會主席，北區對外交通全無發展，我地接手後才開始改善，你點會明？」

無錯既，373A 真係同民建聯有好多淵源。

話說 373A 十一年前開線，係經大欖隧道同埋西隧過海。不過連接荔枝角及沙田既青沙公路係 2009 年開幕前，因為無任何巴士線途經而飽受抨擊。陳克勤開通之前就好關注青沙公路有咩巴士線用，運房局在2月25日既回覆，就講到要將 373A 改經青沙公路。陳克勤無提咩特別關注，及後北區區議會也同意將 373A 改經青沙公路，係3月30日實行。

373A 要改經青沙公路的消息，好快在網上巴士討論區熱傳，網友質疑改行經常塞車既吐露港公路同埋大埔公路，會令到車程大幅增加。不過區議會及當局似乎聽唔到，改路後果然如網友預計，搭客跌左唔少。直至一年零九個月後，區議會及運輸署才修正錯誤，將 373A 改返行大欖隧道同埋西隧，就咁玩左北區居民一穫。

唔知係咪因為呢單野，成日都好關注北區交通既民建聯劉國勳就成為不少巴迷眼中釘，有單野仲俾人搞到上報，就係佢提早半年「成功爭取」。話說劉生出左條 banner 話 373A 加班及延長服務時間，但就無寫清楚實行日期。結果有網友話睇完劉國勳條 banner 落街等車等到變左石頭。查實呢項改動，係佢條 banner 出街後近半年的9月3日才正式實施。

呢兩單與 373A 相關的故事講左兩個問題：第一，其實好多區議員收集居民意見的渠道有問題，個議員本身又唔多搭巴士，問佢地意見佢地都係睇住張朦查查既圖。有D人仲有新即是好既「發展觀」，認為行新路就一定係好事。理性一D既，可能會以「保皇」為目的，用幾十億起左條新路，唔夠車行咁政府面子仲往那裡擺呢？

第二，所謂既成功爭取，往往變成鬥快掛橫額既遊戲，每年運輸署其實都會制訂一份巴士路線發展計劃交予區議會，懂得上網查查，也會大概知道未來一年這一區會有什麼新的巴士路線。這當中「爭取」的含金量有幾多，真係天知地知。