倘若紅色塑料燈一關上。
人潮人聲散去，街市沉寂下來。
施培記老闆施培業，便驟然失去一方有血有肉的生活場景。
其半生過去，便只淪為芸芸生意人隨便一則發達故事而已。
是以，已然名成利就、身家幾億的他，還是要繫一條布圍裙，捋高衫袖，在街坊主婦熟客跟前，開爐點火，親手煎幾塊牛扒豬扒，推銷他的肉類商品。
也實在一個人惟有腳踏實地，才最能夠感覺活着的價值。
（門面、招牌俱平實街坊風格。
店子採超市式運作，人人守秩序排隊付款。）
元朗人燒嘢食，必先來這裏。
施培記這個字號，九龍、港島名不經傳，但在新界元朗，是地頭蟲。
70年代，在元朗舊街市賣凍肉起家。 80年代，兼賣自家調味醃肉，大受歡迎起來。 90年代，已有財力置下整棟物業，遷入牡丹街現址，升格當超級市場，兼營糧油雜貨。及後幾度擴展，在天水圍各屋邨，今有三家分店。元朗人，是親眼看着施培業成長發迹的。有了這歷史因素，大家平日買餸煮飯，天時冷燒烤、打邊爐，都喜歡幫襯他，反而未必會去百佳、惠康那些大集團大超市。
（施培業示範烹調，猛地說要先開猛火鎖汁，再轉細火慢煎。）
「後街都有間佳寶，開咗兩、三年左右啦！但你兜過去睇吓，佢價錢仲平過我些少，生意都唔及我！」施培業說時瞇眼帶笑，臉龐爬上幾道皺紋，沒顯霸氣，倒見一份憨直，像農村鄉下人的表情。
（羊架先煎後切，才最原汁原味。$84/磅）
猛虎不及地頭蟲，出面具名氣的超市，入到元朗頓變陪襯，施培業承認，是街坊有情。「我哋呢啲叫街坊生意，入親嚟都係熟人，買完嘢問吓近況，所以我唔恨開店出九龍㗎，出到去冇人識我。」
（洋蔥豬扒滿是肉汁。$34/磅）
無疑這牡丹街老店，於六十三歲的他，已成一面舞台，人生價值都在此。記者來採訪，他自是興高采烈，連珠炮發作介紹。「你咪睇我只係間迷你超市，我哋主打肉類，凍肉、丸類、醃肉咩都有賣，全部自助式，人客鍾意自己嘛，愈佢就愈高興，好似玩遊戲咁，唔覺意又買多啲，大家都開心。」店子中央，整齊排列約三十盆醃肉，是招牌貨，備夾子、膠袋，長期圍滿一群人在選購。
他好生自豪，心血來潮，顧不了恤衫皮鞋襯圍裙異相，忙不迭架一台炊具，手一伸抓幾塊扒類，放平底鑊裏煎，自製宣傳花絮。
隨即惹來一陣起哄，街坊們好奇搭訕，「老闆，你賣廣告呀？」他喜孜孜眉開眼笑，「《飲食男女》嚟訪問我，介紹我呢度呀！」復又引發議論紛紛，一時喧囂嘈閉，鬧如街巷。果然元朗人還是最喜歡這份熱鬧沸騰。
（買餸時間，必定人迫人。）
有個小攤檔，農村孩童當販子。
施培業是在街市混大的。 1970年代，十來歲的他，因家貧輟學擔家，投靠親友來到合益街市，見那裏一片蓬勃繁盛，頓覺前途有所依憑。
 |
| 早期合益街市所在的五合街 |
「我攞住三千蚊，就學人創業！幾百蚊俾租，再幾百蚊買部不鏽鋼雪櫃，仲有幾百，置貨源。當時識得人做凍肉批發，咪試吓攞貨賣囉，就係咁簡單。」
（拿個夾子，便可自由選購。）
他是汕尾人，兒時隨父母南來香港，開農場養雞過活，一直是農村孩子頭腦，純樸簡單，一下子轉來街市開檔子做買賣，吃盡苦頭。「畀人蝦梗有。新嚟新豬肉嘛！好似一籠雞咁，你放隻雞仔落去，都會啄你㗎！」他採忍字訣，以和為貴，一條心努力做生意，果真做出成績來，「我唔呃秤吖嘛！因為自己做細路，畀人呃得多，成日買貴嘢畀阿媽鬧，所以到自己賣嘢，一定唔呃人。」赤子之心，換來一群熟客，他檔子日益坐大，久而久之，欺負他的人，皆化敵為友。
（事業、人生建基於此，這棟樓他千金不賣。）
年少的他，如此這般漸次成長，成年後娶妻，再偕妻胼手胝足幹活，仍舊窩在同一檔子內，他極欲尋求掙錢新血路，「元朗有好多丁屋吖，後園、天台都可以燒嘢食，大棠再上，又有個燒烤郊野公園， 80年代啲人開始忙、懶整嘢食，我幫佢哋醃埋肉，點會唔受歡迎？」於是他開始鑽研醃肉，不時往當年胞弟經營的茶餐廳，進廚房偷師。一塊肉如何沖浸解凍，讓肉質暖和軟化，但不致過腍；如何按其品種部位，調香料混醃料，他金睛火眼觀察記牢，回去街市檔照辦煮碗，豬扒牛扒雞翼醃得香氣四溢，當堂大賣。
（切肉時會先剷走粗骨，避免上磅時太重，相當殷實。
凍肉切割好，隨即端出店前發售。）
豬扒、牛扒、雞翼，換來一棟樓。
口碑佳生意好，他開始積到點錢，便傳來清拆合益街市消息。「我住元朗消息好準！呢頭話拆街市，附近合財街嗰頭打樁，我就知係起新街市，但街市位得二百零呎，我呢檔生意起緊，肯定唔夠地方用。」他意屬牡丹街地面鋪，貪隔鄰左右俱濕貨商店，整天匯集買餸人潮。「我日望夜望，真係望到而家呢棟唐樓放售。即刻馬實個經紀，人家畀一個佣我畀兩個佣，志在必得……嗰陣我後生，真係好好膽！」他確實是膽搏膽，該處本不及牡丹街另一端暢旺，人人視之為街尾，惟獨他看好新街市開鑼，人流會逆向，這兒會變街頭，不惜使盡積蓄，借貸置下這當年市值千多萬的物業。時為 1989年，所費實不菲，為幫補供款，樓上幾層先放租，樓下千多尺地鋪，除了賣凍肉、醃肉，還着手兼賣糧油醬醋，圖擴闊收入。
如此一來，一闊三大，聘夥計、置來貨、燈油火蠟，跟往昔那二百尺街市檔，差天共地。他向妻子明言，一是大富大貴，一是賠掉所有。
（醃肉香料採老字號鴻聯，配方是老闆多年秘密，效果香濃。）
自此他愈加緊張出品，彼時大陸已改革開放，來貨質量反倒不穩，他轉向海外，「巴西豬扒，肉厚啲又鬆化啲；阿根廷西冷牛扒，比中國耕田牛嫩滑得多；雞翼我入過美國貨，而家入巴西，貪佢大隻、肉地夠。」採購一環，多年以來他堅持親自擔綱，「我同幾十個入口商熟晒，隨手一比，就知邊間平、邊間靚。
（沙嗲墨魚嘴，爽口煙韌。$40/磅
黑椒西冷牛扒，是老闆成名作。$42/磅）
市場上有咩新興品種，我又即刻知。」做門市須與時並進，近年人們燒烤，流行找特別食材，他亦順應，「豬頸肉、豬串骨、墨魚嘴，連羊架都有，成份包錫紙燒，食西餐咁！肉丸又話要爆漿，我哋搵台灣貨，內藏海膽、蟹子、芝士乜都有。」他選來貨，眼光是放諸全球，「禽流感、瘋牛症，邊個國家出事，馬上要向另一處入貨，仲要快，因佢一定漲價。油價跌，蘇聯盧布貶值，你估又有咩事？蘇聯人平日買好多美國肥牛、巴西雞翼㗎，佢哋撻訂，嗰邊咪有平貨執囉。」密底算盤滴水不漏，難怪賬面滔滔，財源滾滾。然而全盤生意，最令他提起勁的，並非這些。
（夥計們感情投契，開工時都是真心笑。）
挽高衫袖，叫賣聲此起彼落。
其實生意早上軌道，人亦已屆退休年齡。施培業大可撒手不管店務，蹺起二郎腿等收錢。但他顯然不愛此套，店子開晨早七點，他便和妻子每朝準時回來。
「我哋元朗鄉下人，慣咗早起身，人客天光嚟買餸，我咪天朦光開工囉。」
店子樓上有個寫字間，採購單、會計單一大堆，他上去處理完一輪，總愛跑下店面來，亮一亮相。
（醃肉銷情好，工場師傅整日手不停。）
街坊也好，街客也好，不論認識與否，一律落力招呼。「呢啲青衣柳，來貨時成米長㗎，我哋要自己切割！」「雞翼有好多款，椒鹽最香口，要辣可以買黑椒，如果細路仔食，就買蒜茸或者香蔥啦！」對方見他講解詳情，如數家珍，通常便會掏腰包購買。
（蜜汁金沙骨香中帶甜，不少人買來加餸。$34/磅）
這便是「叫賣」的威力，「我親口向佢推薦，佢梗心思思想試，第時變咗回頭客，又可以問番意見。」原來門口買賣成功法則，跟古往今來街市販子生存之道無異。
施培業正是享受這份存在感，事事拈手，才覺得是自己的事業。「呢個招牌係我親手湊大嗰喎！我肉赤佢仲多個肉赤我個仔呀！」
這份熱誠，他感染過許多人，第一個是妻子。
其妻名彭興華，比丈夫小八歲，當初嫁人，年僅十八，仍屬黃毛丫頭。「相睇時我淨係知佢賣嘢咋，點知結婚第四日，俾佢拉出嚟開工，咁就做咗三十七年。」彭興華是傳統婦女，嫁雞隨雞，沒吭一聲。養成習慣，如今在店內，她混在夥計堆中，照樣密密手執拾搬貨理貨，從沒擺老闆娘的架子。
（人客挑好貨品，老闆娘彭興華即搶着來招呼。）
店內夥計，都喜歡老闆夫婦，「佢哋對員工好好㗎！從來唔罵人，我哋返工冇氣受。」以為是恭維話，豈料阿清如是說，蠶姐、阿娟、英妹亦然。「我哋唔係叫事頭婆㗎，叫佢阿娘，親切啲；事頭就叫阿爺，跟佢兩個孫嗌！」主僕如家人，工作便投入，夥計之間常互相走位幫忙，做事時都是嘻嘻哈哈的。
（施培業兜轉半生，事業有成，沒辜負奮鬥。）
腳踏實地，便有好風光。
「有呢班夥計我好放心呀，日後我間店要點樣發展，佢哋都能夠配合。」
他此話是有解究的，他兒子施仲珉，三十來歲，正欲在這行業大展拳腳。作為父親者，早有心理準備隨時作後盾支持。
這兒子發展不算順遂，十來歲來施培記幫忙，年少疏懶，跟父親常生齟齬，轉行往外打工，也不如意。至幾年前結婚，施培業心忖兒子終須有份事業，便資助他創業，着他自己辦一家凍肉店。
為父者幾乎是無條件幫忙，出錢資助，張羅來貨，搭通人脈。待至萬事俱備，正式創業，才開出唯一一個條件。「我唔准佢用我施培記個名。要佢自己另開一個字號。」此舉背後有其用心良苦，「如果用我個名，咪等於我施培記開分店，佢生意一定好。但冇意思喎！阿爸畀一百蚊你，都唔夠自己賺到十蚊咁開心吖。」兒子縱然未必同意，亦惟有遵從父訓，自立門戶，取名祥利行。
（兒子施仲珉近年積極找新貨源，想做點成績給父親看。）
店開後父親仍不斷暗中幫忙，提意見、供來貨，只是從不往訪，街坊不知父子關係。祥利行開業頭半年，生意慘淡。兒子急了，問父親意見，「我叫佢執笠算數。」如此反而起了激勵作用，兒子不肯清盤，生意卻逐漸穩定過來。究其原因，當事人亦百思不得其解，「都係聽阿爸講，勤力啲囉，日日返去開檔、睇鋪，守咗一輪，生意就好。」祥利行選址元朗新街，人流比牡丹街旺，但競爭甚烈，同一條街，就有好幾家同類凍肉店。群雄逐鹿，像極他父親少年時代的舊街市。原來處境逼成，人便能激發起一股意志。
（就近一家祥利行，是兒子的努力成果。）
如今仍然年輕的施仲珉，急起發奮，為時未晚，「我舊年去咗德國一個美食展，識咗幾個歐洲肉食商，而家斟緊入黑毛豬、有機農場雞呢啲高級貨源。希望幫自己間店同阿爸間店，拓展一段新里桯。」修橋築路，身邊人做得多了，這次換他來當開拓者，路上光景會是如何？還待實地踏足才可分曉。
施培記食品超級市場
元朗牡丹街 11-13號地下/ 2477 2963/ 7am-8pm
Archived in
https://lihkg.com/thread/636534/page/12
Original source :
https://hk.lifestyle.appledaily.com/etw/magazine/article/20150116/3_17460655/街市人生-施培記食品超級市場-
+++
