何喜華與劉千石 _ 添馬男 _ 主場新聞

添馬男

八十年代畢業於港大，八九年六四時身陷北京前門人潮，從此對政治興趣不能自拔，在傳媒及政圈浮沉多年。獲損友邀請在蘋果撰寫專欄《中門大開》，決心闖入總部，用一本iPad，一枝筆及一張摺凳，揭露政治圈內「膠人膠事」，寸嘴得嚟又有根有據，開本地政治評論新風格。

2013-1-4 6:38:14

SoCo何喜華乃梁粉，傳媒圈眾人皆知。由舊年選舉至今，何喜華多次配合梁振英搞選舉落區、訪貧問苦親民show，大家有目共睹。何喜華其實早應公開交代，SoCo並非他一人話事組織，亦非施麗珊個人組織，因此有必要公開他們個人政治立場。唔知點解，但凡同梁振英拉上關係者，總會感染到詭辯偽術而不自知！

今年九月立法會選舉，何喜華以個人名義支持建制派元秋及田二少，已令前線社工好氣憤，當時佢又詭辯，話用自己名義，而非用社區組織協會名義。佢當傳媒白痴，何喜華與社區組織協會乃二而為一，佢有冇諗清楚自己身份，一個爭取社會公義、基層權益多年嘅組織，支持民建聯建制派候選人，會令多少前缐義工，幫手賣旗學生，捐款市民感到失望。至於當中是否又與新世界捐款有關，大家不得而知，鄭家純本人亦係民建聯監委，屬核心人馬及金主。何喜華至今仍欠公眾一個交代。

佢比明報及蘋果砌完收捐獻拒絕遊行後，立即接受明報專訪澄清，呢個澄清，徹底令佢形象破產，佢否認自己挺梁，連基本政治道德也欠奉。為何敢做唔敢認，如果支持民建聯都得，做梁粉又有何值得羞恥，大方承認，與張志剛、蔡涯棉、林奮強結盟，有何不可？只要清楚交代，轉型也好、轉軚也好，總好過詭辯！

何喜華曾幾何時係有道德感召力之人，獻身服務基層，不為名利，好多社工以佢為榜樣。何喜華並非王菀之，以不問政治作理由去收受建制派捐獻，錢係用於扶貧，但公眾見到卻係利益交換，何本人為建制派候選人背書，當梁政府要求法院提請釋法，SoCo宗旨乃捍衛人權法治，何卻支持梁振英去踐踏法治。

每年SoCo買獎券好多民主派、社運中人支持，因為知道佢地係捱，佢地有金主大筆捐獻後，何喜華無需再靠市民一分一毫捐助，所以先至唔再尊重真正民意及主流核心價值，尤其是見到施麗珊為梁僭建辯護，更加谷氣 。

見到今日何喜華，令我想起昔日劉千石，70年代尾佢曾經係劉千石助手，係劉千石帶佢出身，兩人的政治結局，會否一樣？在乎何喜華一念之間。

刊於蘋果日報，金融中心版