添馬男
八十年代畢業於港大，八九年六四時身陷北京前門人潮，從此對政治興趣不能自拔，在傳媒及政圈浮沉多年。獲損友邀請在蘋果撰寫專欄《中門大開》，決心闖入總部，用一本iPad，一枝筆及一張摺凳，揭露政治圈內「膠人膠事」，寸嘴得嚟又有根有據，開本地政治評論新風格。
2012-9-11 7:36:11
建制派經典代表作是新界西，民建聯譚耀宗、陳恆鑌、梁志祥、工聯麥美娟全部勝出，得票分別為譚耀宗四萬三、陳恒鑌三萬六、梁志祥三萬三、麥美娟三萬五，唔使做票王，四人當選fit晒。
究竟Winning Ugly戰略，泛民能否適用呢？好難，明知有偷雞機會，也執行唔到。馬後炮好多人指摘泛民策略失誤，但平心而論，只有一個超級選舉機器，配合各種條件，先至可以準確成功執行。首先有黨組織紀律，人人守規矩，按既定計劃分區拉票，唔准越區拉黨友票，唔准因一時民調上落便喊苦喊忽，亂Q告急搶自己兄弟姊妹票。泛民做唔到，因佢哋ego太大，個個要入波，鬥早告急搶票，邊個肯冒低票當選風險呢？新西民主黨也拆兩條，高達同陳樹英兼且係夫婦，斷估唔會出蠱惑搶對方票，新東也拆三條，結果高票落選。
泛民只係雜牌軍，一個冇嚴格組織紀律的民主陣線，黨與黨之間無法過票，也無法禁止互不搶對方地盤票。最重要佢哋背後冇一個「阿爺」做裁判，掌握賞罰機制，邊條友唔聽話就郁，咁先可解決爭議。民主派之所以係民主派，因為佢哋唔係如共產黨般黨性強，以集體利益為先，人性就係自私，為自己利益着想。在幾千至幾百票之間去操作配票，泛民再研究學習多十年也做唔到，因為呢個唔係選戰技術問題，而是政黨操控選民意志，巿民心甘情願放低個腦，跟從組織指揮問題。
要成功在選舉中運用Winning Ugly策略，必定要有所謂「僵屍票」，各候選人肯乖乖守紀律，唔告急或越區搶票，因為有集體分配「僵屍票」，冇規冇矩搶自己人票者，會擔心受懲罰，調走僵屍票。而「僵屍票」組成，先至係Winning Ugly精髓所在，因為真係醜惡，泛民亦唔會做。
首先係新增13萬老人票，老人院集體登記做選民，再一車一車去投票。另一批老人係經年累月用蛇齌餅糭收買，你叫佢投邊個都冇所謂。每區只要調動到幾千僵屍票，就可決定最後一席誰屬，未計中聯辦系統控制同鄉會、工聯、青年及婦女組織。
泛民支持者，以中產、年輕人、教育水平高為主，即使泛民學到足，又有大把水，派蛇齋餅糭，佢哋邊可能心甘情願投身僵屍之列。不做僵屍但泛民支持者會自己策略性配票，例如超級區議會，我識好多人自動配畀馮檢基，為咗一個理由，就係隊低劉江華。但要細緻到調動幾千票去贏分區直選最後幾席就冇可能，呢種巿民自動配票，出錯機會相對高，如公民黨明星告急，為保余若薇，可能吸走民主黨高達票，結果女神同高達雙雙出局。
我明白好多泛民支持者，難以接受贏了選票、輸了議席呢個結果，但公道講，新西慘案實非戰之罪。今日同泛民對選，係共產黨，唔係建制派咁簡單，佢哋有能力指示梁振英取消重要外訪APEC之行，在臨近選舉前連出三招，港人港地、擱置自由行擴大及取消三年國教開展期，目的為保建制派，咁仲唔明，泛民依家係打緊「大佬」，唔係民建聯，只有大佬在背後作操盤手，才能實現Winning Ugly戰略，李永達，咪嘥時間去研究，你一世都學唔到，儍仔！
在反國教運動及投票率高企下，大家對泛民期望上升，而明星墮馬，倍添悲情。冷靜下來，回心一想，泛民成功奪取27席，實已萬幸。至少在超級區議會、會計、IT界偷番佢雞，取回三席。
原刊於蘋果日報，金融中心版
沒有留言:
發佈留言