CY鬧劇騎呢show _ 添馬男 _ 主場新聞

添馬男

八十年代畢業於港大，八九年六四時身陷北京前門人潮，從此對政治興趣不能自拔，在傳媒及政圈浮沉多年。獲損友邀請在蘋果撰寫專欄《中門大開》，決心闖入總部，用一本iPad，一枝筆及一張摺凳，揭露政治圈內「膠人膠事」，寸嘴得嚟又有根有據，開本地政治評論新風格。

2013-1-3 6:35:03

元旦挺CY無端上演一場鬧劇，表面撐實質踩，先打NOW記者，再有職業CY fans公廁出糧大踢爆，其唱衰效果比長毛、阿牛、民陣大得多。自從反國教一役後，建制勢力決定以群眾對群眾，一大棚撐CY團體被組織動員起來，呢類政治動作，添煩添亂，仲會適得其反。在台灣九十年代初，民進黨及社運勢力抬頭之際，國民黨也一度動員自己群眾組織上街，而傳媒則不斷踢爆參與者乃「走路工」，即係收錢上街職業示威者，示威遊行唔係靠人數咁簡單，而係參與者所展示出來嘅「精神面貌」，學民思潮發動包圍政總所以成功，同樣係黃之鋒、黃莉莉、張秀賢等人展示出來嘅「精神面貌」，年青、有理想、有學識、敢作敢為。呢類氣質只存在反建制人士之中，對唔住，真係冇得學。

由於先天上親建制就一定唔可能有型，傳媒效應已嚴重削弱，究竟仲搞嚟為乜？當然係為咗交差，以示自己團體支持政府，花些少使費，日後頭目人物便可索取政治酬勞，何樂而不為。正如社團開片，大佬call行友，醒目仔定必老遠由屯門、元朗帶大班人出旺角，明知打唔成，但至少出過力，不計成效，總有分紅。傳媒明知上幾次撐國教群眾古靈精怪，自然會千方百計搵出「走路工」玩踢爆，而結果呢類撐CY活動不單撐唔住CY，更會令記者更加討厭佢。

要「平衡反對派勢力，搶奪傳媒話語權」，唔可以靠低水平群眾活動，反而最近王菀之、高皓正一類「我討厭政治」、「要敬拜權威」等提法，仲有多少巿場。今時今日要挺CY挺得有論據，實在唔容易，與其自暴其短，不如玩「反智」，一句我討厭政治，唔駛點用腦，大把fans、信徒和應，也適合唔多用腦的新一代，至少可以將大片青年人中立化。建制派低能之處係希望將反對者爭取過來，其實要河蟹，最重要係令青年人繼續唔用腦、非政治化、低低能能就覺得好幸福。

香港其實唔係咁多個黃之鋒，王菀之就有好多，但以特區今日政治揸fit人水平，又怎會明白，睇怕要靠新市委書記指點。

刊於蘋果日報，金融中心版