啓蒙書放櫃是另類溝通

阿仔最中意揸住啲幼兒啓蒙書。佢又唔係認真讀，只係揭吓揭吓，有時仲上下掉轉嚟。佢只係用嚟舞吓舞吓。

但有個壞習慣係中意扔，當豆袋咁扔遠。結果係好實淨嘅啓蒙書都扔散。咁我揾膠紙黏番佢，佢又再扔，甚至會專登搣我黏嘅膠紙。結果差不多由封面到書背嘅每一頁都黏過。

老婆通常無心機搞，見到爛咗就放返櫃筒。咁我開櫃筒發覺就黏番放回去。阿仔都會去嗰格櫃筒摷嚟玩。

嗰陣係多年前啲短租散貨場10蚊店買嘅，右邊呢本《交通》係其一（見下圖）。我見扔到咁爛，偶而見到觀塘仲有書店賣呢啲書，就走一次去觀塘掃幾本返嚟。

淘寶都有啓蒙書賣，但總覺唔合用，也無咁實淨。

買咗嘅包括左邊呢三本，但時間耐咗一樣扔到殘。不過佢中意新書多啲，次次都係自己摷新書玩。

呢幾日見佢無喇喇摷番呢本舊書《交通》出嚟。諗吓諗吓有啲唔對路。

原來三本新嘅都扔爛晒，但佢將爛咗嘅全部收埋櫃筒，好似佢阿媽做法一樣。

咁我又逐本修補，雖然煩啲，但真係可以完整無缺砌番三本12頁小書出來。

咁我同佢講，整番好有得玩喇，我都讚佢識放好，但提醒佢如果下次識同爸爸講係爛咗就更好。