以分體冷氣滴水來論政係佮佮冚

本來只是分體冷氣滴水，待弄清問題後，其實和金權政治極為相似，直頭佮佮冚，細思極恐！

話說部冷氣買咗一年多啲，一個月前起，忽然有時室內滴水。雖則真係現在勁熱係由朝開到晚無停。

咁我哋停佢幾個鐘，再開返就唔滴。

我哋打去安裝冷氣嘅公司問，個師傅都好好心機答。佢話依家温差大，即是由百年一遇嘅酷熱天氣，個冷氣要制冷到舒適温度 （通常政府叫你校到 25 度）

咁佢話太大地方個 engine 做唔嚟，而解決方法係，校到極低目標温度，去到16度、18度！因為咁樣個 engine 可以盡情奔馳，就唔會在一冷一熱間凝結出倒汗水。

我哋將信將疑，但照跟佢做，又得得地。不過，過得一排，又係忽然會滴。

咁我哋都醒起佢話「應該每兩個月清下隔塵網」。無計可施之下，諗住即管洗下，就算唔得，乾淨啲也是好的。

點知拆塊隔塵網，點解咁實呢？先至發現怪事：個冷氣隔塵網入風位，同出風位之間竟然結晒冰。

雖然之前都有細細塊結霜咁跌落嚟 （大暑天飛霜呀！），但家陣個感覺係冰川溶化！

連隨攞個風筒吹溶啲冰，抹乾後再開機，好似解決咗問題。

***

老婆問點解大熱天會結冰咁奇？我大概咁理解。

隔塵網確係「藏污納垢」，令到入氣受阻，咁近出風位嗰部份，就有機會由出風位「過水濕腳」，驟然受冷。受冷又長期停留在有利位置，於是「凍者愈凍」，凍到結冰。

而這在外觀上仍看不出。

到冰川滿到無法掩藏，水就從不正常渠道流走。

與此同時，冷氣機本來是由吸入室內空氣的温度，感應當時室温，但這些「既得利益」的冰川「蒙蔽」了温度感應器，以為全天下都豐衣足食，實際上「朱門酒肉臭，路有凍死骨」。

所以後來聽個師傅講開大冷氣，反而覺得目標温度為18度時，涼快程度還不及之前校到23、24度時。

但又極不穩定，開一輪後又凍返，以至我們「摸著石頭過河」，又調校至21度。

後來我們明白了，因為中途有熄冷氣，那麼冰川稍溶，就好像權貴們「手指罅漏啲出嚟」，咁係會好過一些，但效果很短暫。

如果沒搞清問題，那麼系統仍然是極不穩定，不能長遠維持，遲早拉柴。

到我發現了，用風筒將冰川溶走，再沒特權階級，又沒傷及機件，此為「和平演變」。

如果心急要揾鑼絲批鑿走撬走冰川，會有傷及裡邊機件的可能，那時就是武力革命！如果傷到無法修理，要換部新機，那就是改換國體了！