創世紀和醫道

剛剛今晚看完創世紀第105集大結局。故事裡面阿LIK (明明叫做阿力，張自力，點解佢D friend會叫佢阿LIK？) 的劇情最不合理，明明已經知道大哥的死與葉榮添無關，報仇計劃便應停止，甚至應該與添一同合作搞無煙城才合理，但係佢變到中飽私囊，不擇手段，只在追求自己利益，又好似唔多合理。前一集佢臨死都有講，「我唔知自己係邊個，我唔知為乜。」人有時又真係幾唔理智，會幾迷失自己，越係錯得大，越唔肯承認，甚至自我欺騙，去合理化自己。「公道自在人心」？人心不同，各如其面，有幾多個不同的人心，就有幾多個不同的公道。
今晚醫道劇情又好應題。眾人逃避倭寇來到村落，看到有孤零零的小孩，許浚又是「不可拋下病者不顧」。平時睇覺得好偉大，今日就覺得係迂腐。吾根叔就一心想快走，擔心倭寇一來就無命。最後倭寇出現，眾人躲起來時，小孩啼哭，眼見就要敗露行蹤，全靠尚華冒死把倭寇引開。眾人慌逃上船，許浚不願開船，說甚麼也要等尚華。但最後尚華還是來不及上船，遭了毒手。

救人不是不對，但假如明明無可能救得來，或者機會很微，甚或連累自己或他人，那還應不應去救？假如有五個人，但隻艇得四個位，係唔係要講義氣就一齊唔走，一齊等死？所以，很多時，講道德係唔容易，唔容易係因為，點至叫有道德？自己自以為正義，結果累死別人，咁算唔算道德？但如果向現實低頭，又要擔負惡名，又會良心不安。這就是道德困局也。